దగ్గరైన ఆరోజు

వెలుగుల అలలపై తేలియాడుతున్న
కలల నావ కఠిననిజం తాకిడికి
తట్టుకోలేక తిమిరపు నీడన కరిగినప్పుడే
తెలుస్తుంది నాకు 

నువ్వు ఈ రోజు కూడా
రాలేదని..
దగ్గరైన ఆరోజు మరింత దూరమైందని

వేకువ ఒడిన వెలిగిన వసుధ 

కదిలే కాలపు చక్రంలో చిక్కని  నీ
విరహపు వేడిమి తాళలేక
చీకటి నీడన చేరినప్పుడే 
తెలుస్తుంది నాకు  

నువ్వు ఈ రోజు కూడా
రాలేదని..
దగ్గరైన ఆరోజు మరింత దూరమైందని

తలపుల్లో కురుస్తున్న వలపులన్నీ 

ఊహలలల్లిన ఊసులమాలలే నని

జాలిగా  నను  తాకిన కన్నీటి స్పర్శ

నా చెక్కిలిని తడిపినప్పుడే 
తెలుస్తుంది నాకు  

నువ్వు ఈ రోజు కూడా
రాలేదని..
దగ్గరైన ఆరోజు మరింత దూరమైందని