రాధాకుంజం లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
రాధాకుంజం లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

23, సెప్టెంబర్ 2016, శుక్రవారం

గడిచిపోయిన వసంతం


జ్ఞాపకాల వీధిలో గడిచిపోయిన వసంతం

వెతుకులాడే మనసుకి విరహమిచ్చిన శిశిరం

వెన్నెలంతా వెల్లువై యదను చుట్టిన వసంతం

కన్నులంతా సంద్రమై జాలువారే శిశిరం

పువ్వులన్నీ పరిమళమై పరవశించిన వసంతం

ముళ్ళు దిగే  గాయంతో భారమవుతున్న శిశిరం

కాంతిరేఖల తళుకులతో వెలుగులీనే వసంతం

దారితెలియని దిగులుతో తిమిరమైన శిశిరం

వాడిపోని ప్రేమజ్యోతితో  ఉజ్వలగీతమైన వసంతం

ఆవిరయ్యే ఆశాదీపంతో ఊయలలూగే శిశిరం

వేణులోలుని అధరపానమున మత్తిల్లిన వసంతం
మూగబోయిన రాధ మదిన మౌనమైన శిశిరం 

మధురనాదుని అధరరవమున రవళించినవసంతం
మరువలేని రాధ హృదిన విరహగీతినారాధనైన శిశిరం 


జ్ఞాపకాలవీధిలో గడిచిపోయిన వసంతం
వెతుకులాడే మనసుకి విరహమిచ్చిన శిశిరం 

12, అక్టోబర్ 2014, ఆదివారం

వెన్నెలనీడలు

ఏ ఇంతి తన పూబంతుల
చేబంతులాటలో నిన్ను కట్టిపడేసిందో

ఏ సుదతి విరిబంతుల సుగంధ మాలికలలో
నిన్ను ఉయ్యాలూగిస్తోందో

ఏ రమణి రాసలీలల రమణీయవర్ణనలో
రాగాల వర్షంలో నిన్ను నిలువెల్లా తడుపుతోందో

ఏ కాంత చంద్రకాంతల చలువపందిరిలో
చల్లని చిరునవ్వుల వెన్నెల దీపమైనావో

ఏ లలన లాలిత్యపు మాటలతోటలకి
పల్లవించు వలపుపాటల పందిరివైనావో

ఏ ముదిత మోము ముద్దమందారమై
విరిసేందుకు ఉదయించే కాంతివైనావో

మరి నీవింకా రానే లేదు

ఇదిగో ఇపుడే వస్తానని

నీవు నను వీడి వెళ్ళినపొదరింటిపై 
కొన్ని యుగాలుగా
జాలువారుతున్న వెన్నెలనీడలు
నీకు నా కబురు చెప్పాయా

వెలుగులీను నీ ప్రేమపుంజంలో
కలిసి  తళుకులీనాలనే ఆశని
నీకు గురుతు తెచ్చాయా



6, జులై 2014, ఆదివారం

ఎదను వీడింది


మరచిపోయిన మధురగానం
మళ్ళీ పలికింది
మరువనివ్వని మనసులోతుల్లో
మెదిలి నవ్వింది

కంటి కందని కావ్యమేమొ
కలని దాటింది
ఇలను తాకిన కలయె తానై
వెలుగులీనింది

మూగపోయిన మౌనవీణ
మదిన మ్రోగింది
మరపురాని మౌనగీతం
మనసు నింపింది

ఎదుటపడిన యదుకులేశుడు
హృదికి చేరాడు
ఎదురుచూసిన ఎదురుచూపు
ఎదను వీడింది


31, మార్చి 2014, సోమవారం

నీ రాధ


అపుడెపుడో
వెన్నెల ఒడిలో తానొదిగి
తన్మయమై విన్న వేణుగానాన్ని
మరి మరి  తన మది తలచిన చీకటి
తన వాకిట వెలిగే వెన్నెలగానానికై
తూరుపు వెలుతురు కంటపడకుండా
చుక్కల పువ్వుల చాటున దాగుతోనే ఉంది

అపుడెపుడో
నవ్వుల పువ్వుల మధ్య తానూ
విరిసి మురిసి శిశిరపు ఒడి చేరిన
అవని మది బృందావని
వచ్చి విరిసే వసంతానికై
ఆశలతివాచీని శిశిరపు తోడుతో
అడుగడుగునా పరుస్తోనే ఉంది

అపుడెపుడో
వెన్నెల వెలుగులలో
తళుక్కుమని మెరిసిన యమున
తారల కన్నులకాంతిలో
నీ వెన్నెలక్రీడకై వెతుకుతోనే ఉంది

అపుడెపుడో
వినిపించిన
నీ మధురమురళీ నాదంతో
తన హృదయనాదం కలిపిన
రాధ
నీ రాధ
నీ అడుగులసవ్వడికై 
తన హృదయపు సవ్వడిని నిశబ్దం చేసి
మౌనమురళి సాక్షిగా 
నీకై ఇంకా వేచి చూస్తోనే ఉంది.............



14, ఫిబ్రవరి 2014, శుక్రవారం

పలుకలేని వెదురు


పలుకలేని వెదురు
పలుకు నేర్చి హొయలుపోతోంది
పరుగుతీసే పిల్లగాలి
పరవశించి పల్లవిస్తోంది

నడకనేర్చిన యమున
నాట్యమాడింది
కురుస్తున్న వెన్నెలధారలో
తళుక్కుమన్నది

వేచియున్న బృందావని
విరిసి మురిసింది
విహారి రాసవిహారంలో
వెలుగులీనింది

కలువకన్నుల చెలియ
కలను కూడ చెలిమినీవంది
కనులనిండిన ఆరాధన
కమనీయ కావ్యమైంది

నీవు వీడిన వెన్నెలదారి
తిమిరమైంది
కాంతులీనిన కలువకనులు 
అంబుధినిలిచాయి  

విరహవీధిన రాధ
నిలువలేనంటోంది
కన్నుదాటిన క్షణం
కలయని అంటోంది

చెంతచేరిన విరహగానం
కల కల్ల అంటోంది
జాలిలేని కాలం
జరిగిపోతోంది

కలవలేని రాధ
విడువలేనంటోంది
వలపు వాకిట
వసివాడని తలపునంది

హృదిని తాకిన  మౌనరాగం
మరువలేకున్నది
మదిని దాగిన మధురబాధ
మరపునెరుగనన్నది











19, జనవరి 2014, ఆదివారం

నిత్యమేగా మరి


నీవు వీడిన బృందావనిని చూచి

చందమామ తెల్లబోయింది
చుక్కలన్నీ చిన్నబోయాయి

మధురవేణువు మూగబోయింది
రాసరాగం ఇక పలుకనన్నది

జ్ఞాపకాలపొదిలోకి వెళ్ళనని
జరిగిన గాథ జాలిగా అర్ధిస్తోంది

మల్లెలన్నీ మరలిపోయాయి
జాజులజావళి నిలిచిపోయింది

మౌనం కన్నీరైంది
నిశబ్దం నివ్వెరపోయింది

నీవు లేవని నిలువలేనని
కాలం ప్రవాహంలో బిందువవుతోంది

కానీ .....
నీవు మిగిల్చిన
ఆ ఏకాంతపువీధిలో
కలల అరుగుపై
గురుతే జీవితమైన
చిన్ని రాధ
నిలువలేక నిదురరాక
ఆశలమాలకడుతో
ఊహలఊయలలో
నీకై
ఇంకా అలానే
ఎప్పటిలానే
ఇంకా అలానే
 వేచిఉంది

నీ ఒడిని చేరిన రాధ ప్రేమ నీకు గతమైనా
నీవు ఒలకబోసిన వేణుగానం నేటికీ ఏనాటికీ
తనకి నిత్యమేగా మరి

24, డిసెంబర్ 2013, మంగళవారం

ఎవరు చెపుతారు




అదిగదిగో అలనాడు ఆ నెలరాజు
నీ మధుర మురళీ అధరరవం విని
సంభ్రమముతో విప్పారి కనులారా
నినుచూచి నేటికీ విచ్చినమల్లెలానిల్చెనా నింగినే

అదిగో ఆనాడు జారిన ఆ వెన్నెలతునక
నీ మురళినితాకి తళుకులీని
తెల్లవారినా వెనుకకి మరలక
నీ దిష్టి చుక్కై నిల్చెనీనాటికీ

ఆనాడు నీ రాసధారలో
తడిసి ముద్దై మురిసిన
మందారం మిదిగో బిడియంతో
ఎర్రబడే వుంది నేటికీ


అదిగో నీ మంజీరపాదరవళితో మమేకమైన
బృందావని ఇంకా నీ మువ్వల మధుర నాదంతో
ఘల్లు ఘల్లు మంటొనే ఉందీనాటికీ...


కాటుకకన్నులకాంతితో
దోబూచులదొంగాటలనాడి
నీ రాధ పొగడసుధలజాడతో ఇంకా
పూపొదలచాటునవెతుకాడుతోనే ఉంది నేటికీ ...


ఇదిగో ఇప్పుడో అప్పుడో
వచ్చేస్తావని పిచ్చితల్లి
ఇంకా అటూ ఇటూ గడపలోనే
తిరుగాడుతోనే ఉందీనాటికీ ...

పాశం తో నిన్ను బంధించగానే
పాశహారివై  తిరిగిరాని వీడ్కోలు నువ్వు చెప్పావని
ఆ తల్లికి ఎవరు చెపుతారు  ?

నిండుకోని వెన్నకుండా..
పగులెరుగని నీటికుండా...
మూగపోయిన మౌనవేణువా....
మరువలేని మధురారాధనా.......








26, జులై 2013, శుక్రవారం

చోటే లేదే


చిన్ని చిన్ని ఊసులన్నీ
వత్తుగా అల్లుకున్నాను
నీకు పూమాలగా వేద్దామని..
కృష్ణా
అష్టభార్యలు నీకు
వేసిన బంధాలమాలలో
నా ప్రేమమాలకి చోటే లేదే

గోధూళివేళ గోకులవీధిన
కరిమబ్బునీడన కన్నెలచాటున
కవ్విస్తూ కనపడతావనుకున్నాను
కృష్ణా
రాచనగరు వీధిన విహారంలో
వ్రజవీధికి నీ స్ఫురణలో చోటే లేదే

నందుని ఇల్లాలు నీకు నయనానందకరంగా
నవనీతం ఆరగింపచేస్తుంటే కన్నులారా
చూద్దామనుకున్నాను
కృష్ణా
వింతవింత భక్ష్యాలేకానీ
వెన్నపూసకి నీ విందులో చోటే లేదే

వ్రాయలేని రాసలీలమాధుర్యాన్ని
ఒడిని నింపుకున్న బృందావనిలో
నిన్నుకనుల నింపుకున్నరాధాదేవి
తన శ్వాస నీవంటే సమీరమై వెళ్ళాను
కృష్ణా
మరి తన మదిలో నీ వలపు తలపు
నిశ్వాసమే తప్ప  ఉఛ్వాసానికి చోటేలేదే 
   
  

26, జూన్ 2013, బుధవారం

ఎక్కడున్నాడు ఆ మురళీధరుడు 2

ఎక్కడున్నాడు ఆ మురళీధరుడు

నిశ్శబ్ధమైన బృందావనిలోనా
నిదురనెరుగని కన్నీటిధారలోనా

మౌనమైన మధుర వేణువులోనా
ఒంటరైన వెండివెన్నెలలోనా

పురిని ఒదిగిన నెమలికన్నులలోనా
మాటరాని మౌనవేదనలోనా

కానలేని కలువచెలియకనులలోనా
పరుగుమరచిన యమునాతటిలోనా

రాసలీలఒడిని వీడలేని చెలియల మదిలోనా
జాలిలేక జరిగిపోతున్న కాలపుజాలంలోనా

వేచలేక ఒరిగిపోతున్న పొగడపునీడలోనా
ఊసులన్నీ ఊహలైన ఆశనిరాశ ఊయలలోనా

ముగిసిపోయిన మధురగాథని
ముగవనివ్వ నీ  రాధ నిరీక్షణలోనా

ఎక్కడున్నాడు ఆ మురళీధరుడు
   
  

14, జూన్ 2013, శుక్రవారం

ఎక్కడున్నాడు ఆ మురళీధరుడు (1)


ఎక్కడున్నాడు ఆ మురళీధరుడు

చిన్ని కృష్ణుని చేతులారా పెంచిన
యశోదమ్మ కన్నుల్లో

గోపాలుని లాలనలో పెరిగిన
గోమాత కన్నుల్లో

ఆలమందల కాపులో అల్లరిచేసిన
గోపాలుర కన్నుల్లో

వేణుగోపాలుని వేడుక చేసిన
వ్రజకాంతల కన్నుల్లో

నేలనున్న తనని మింటికెత్తిన
గోవర్ధన గిరి కన్నుల్లో

రాసలీలకి రాత్రిని కానుకనిచ్చిన
కరిగిన పగటి కన్నుల్లో

అక్ర్రూరుని రధచక్రాలకింద నలిగిన
రేపల్లె  వాడల్లో

కంటికట్టు దాటి
గోకులంమంతా
అందరికన్నుల్లో
తానై తిరుగాడుతున్న
యమున ధారలో
తడసి ముద్దవుతున్న
రాధ కన్నుల్లో
తనదంతా తనకేఇచ్చి
తన నీడగా మిగిలిన
ప్రేమధారరాధారవిందంలో...
   
     

8, జూన్ 2013, శనివారం

వేచిన రాధ ...




వేచిన రాధ వెతుకులాడుతోంది
నీ కన్నుల్లో దాగిన తన బింబానికై

వేచిన రాధ మది తపన పడుతోంది
నీ హృదయంలో దాగిన తన హృదికై

వేచిన రాధ కంటి ధార జాలువారుతోంది
నీ పదములతాకి ఆరాధన అవ్వాలని

వేచిన రాధ అడుగు తడబడుతోంది
నీ పిలుపు వేళగాని వేళ తాకుతోంటే

వేచిన రాధ తాపముతో
రాధా రాధా అని పలవరిస్తోంది
అవును రాధా రాధా అనే పలవరిస్తోంది
పరవశిస్తోంది
ఎందుకంటే
నీ గుండె చప్పుడే తనకి వేదమంత్రం కాబట్టి....

అయినా తను వేచింది
తిరిగిరాని
నీకోసం కాదు
తనకోసమే

నీ పిలుపులో పలికే తన కోసం
నీ ఆత్మలో కరిగే తనకోసం
నీ శ్వాసలో ఊగే తనకోసం
నీ కన్నుల్లో నిల్చిన తనకోసం

నీ ప్రేమమందిరంలో నీవే
తానై తానే నీవైన తనకోసం  .....
వేచిన రాధ .....



7, మే 2013, మంగళవారం

నయననీలములు



ఏమి ఇవ్వగలను నీకు నేను

హృదయాన్ని అర్పిద్దామంటే
వేచి వేచి వేదనతో వేసారిపోయింది

మనసుని అప్పగిద్దామంటే
తలచి తలచి తానే లేనంటోంది.

తనువుని అందిద్దామంటే
తపించి తపించి తాపమునొందింది
 
మరింకేమివ్వగల నా
నీలమేఘశ్యామునికి నా
నయననీలములు తప్ప

   
  



28, ఏప్రిల్ 2013, ఆదివారం

ఎవరూ లేని ఏకాంతసీమలో

 

ఎవరూ లేని ఏకాంత సీమలో
ఉవ్వెత్తున లేచిన ప్రేమకెరటం
నీ మౌనం

ఎవరూ లేని ఏకాంతసీమలో
అంతా తానై నాలో నిండిన వేదం
నీ మౌనం

ఎవరూలేని ఏకాంత సీమలో
ఒలుకుతున్న మధురనాదం
నీ మౌనం

ఎవరూ లేని ఏకాంతసీమలో
నన్నొంటరిని చేసిన గానం
నీ మౌనం
 
ఎవరూలేని ఏకాంతసీమలో
నిట్టూర్పుని తాకుతున్న ఓదార్పు
నీ మౌనం

ఎవరూ లేని ఏకాంతసీమలో
ఎదురుచూపును ఎదనుమోస్తున్న కాలం
నీ మౌనం

ఎవరూ లేని ఏకాంతసీమలో
నాలోని నేను నీవే అన్న నేస్తం
నీ మౌనం
 
ఎవరూ లేని ఏకాంతసీమలో
నన్ను నీలోకి తీసుకుంటున్న మౌనం
నీ మౌనం
అది
ఎన్నటికీ ఎడబాయని వేణుగానం
విరహమెరుగని మౌనసంగమం  
   
     
  
  

15, మార్చి 2013, శుక్రవారం

ఏకమై.....


కలువులాంటి కనులలో నీరు నిండి
నిను చూడలేక పోయినా

గంధపు మేని చాయచాయ నీకై తపించి
వన్నె తగ్గినా

అద్దిన చందన నిర్మాల్యం విరహతాపానికి
నేల రాలినా

నీ పూజకై తెచ్చిన  మల్లెలు
నీకు ప్రియమైన నవనీతాన్ని
స్ఫురింపచేసి నిశ్చేష్టని చేసినా

పూజించినా లేకపోయినా
అర్చించినా అర్పించుకున్నా
ధ్యానించినా శ్వాసించినా

ఆ రాధ ఆవేదన అంతా
నిను బాసిన ఆమె హృదయవేదన
నీకు ప్రియమైన ఆత్మ నివేదన

ఆ రాధ ఆవేదనంతా ఆరాధనై
ఆరాధనాధార అనురాగధారై
నీ కనులు తానై
నీ మనసు తానై
నీ జగము తానై
నీలోని తాను తానై
మమేకమై
ఏకమై......

      
      
  

10, మార్చి 2013, ఆదివారం

నే నవనీతచోరుడైనది


మురిపెంతో ముద్దుగా తిలకాన్ని దిద్దుదామంటే
మూడు కనులు తో ముక్కంటి వైనావవు

చందమామని చూపి మురిపింప చేద్దామంటే
నెలవేలుపుని దాల్చి చంద్రశేఖరుడైనావు

అంబుధిని చూపి అబ్బురపరుద్దామనుకుంటే
విష్ణుపాదపద్మజని శిరమున ధరించి  గంగాధరుడైనావు

 

కావ్యంలా కదలాడే చేపలని చూపుదామంటే
సుందరమగు మీనాక్షిని కూడి అర్ధనారీశ్వరుడైనావు

తీపి తీపి  పరమాన్నాన్ని తియ్యగా తినిపిద్దామంటే
కంఠాన నిండుగా గరళం దాల్చి నీలకంఠుడైనావు


ఏ మురిపం లేక నినుకన్న
తల్లి చిన్నబుచ్చుకుంటుందని
తల్లి నే వద్దనుకుని

దిగంబరుడైనావు
 

నీ కరుణామృతం నవనీతం
అందుకే నీకై నిన్ను పొందుటకై కదూ
నే నవనీతచోరుడైనది...

    

    

  

22, డిసెంబర్ 2012, శనివారం

రాధానురాగం


కురుస్తున్న వెన్నెల వానలో
విరుస్తున్న సుమాల వన్నెల నావ

విరుస్తున్న వన్నెల నావలో
మురిపిస్తున్న మురళీధార

మురిపిస్తున్న మురళీ ధారలో
పల్లవిస్తున్న రాధాకృతి

పల్లవిస్తున్న రాధాకృతిలో
జాలువారుతున్న వేణుసుధ


జాలువారుతున్న వేణుసుధలో
పరవశిస్తున్న  రాధారాగం


పరవశిస్తున్న  రాధారాగంలో
కరిగిపోతున్న వంశీరవనాదం

 
కరగిపోతున్న వంశీనాదంలో
కలసిపోతున్న రాధానురాగం.

    
    

11, డిసెంబర్ 2012, మంగళవారం

సరోజం


నీ వదనసరోజం
నయనానందం
 

నీ అధరసరోజం
వేణువినోదం
 

నీ హృదయసరోజం
రాధానందం
 

నీ పదసరోజం
ముక్తి ముకుందం

    
   
  

27, నవంబర్ 2012, మంగళవారం

ప్రియమార తీసుకోరాదా ....


రేయంతా రాసలీల చూసిన ఆకాశం సిగ్గుతో ఎర్రబడుతో నన్ను హెచ్చరిస్తోంది నీ పూజకి వేళవుతోందని.
 

మాధవా !  అడిగావుగా మరి మైమరపింపచేసే పుష్పాన్ని ఒకటి తెచ్చిపెట్టమని.
 

విరిసిన నందివర్ధానాలు ఇప్పుడా రావడం అంటూ స్నేహం గా పలుకరించాయి. కోయనా వాటిని .
 

ఇదిగిదిగో ఇక్కడున్నాను అంటూ మంచుతడిలో ఆకుల చాటున నక్కిన ముద్ద నందివర్ధనం నవ్వుతూ పిలుస్తొంది. తీసుకోబోతుంటే మరొక పిలుపు ఎటు నించి?
 

అదిగదిగో ఆ మల్లెపొదనుంచి ....
ఆగాగు రాత్రనగా విచ్చితే ఇప్పుడా వచ్చేది అని కాస్త చిన్నబుచ్చుకుంటున్న మల్లెలు . జల్లనా మరి 


మేమిక్కడ అంటూ ఎత్తున ఉన్న కరివేరం సుగంధాలు నిన్నూ పిలుస్తున్నాయా ...
 

నిన్ను తాకితే గాని విచ్చుకోనని మారాం చేస్తున్న మందారం, ఆగలేక తాళలేక రాలిపడుతున్న పారిజాతం ...
 
అసలైనా ఏది ప్రియం నీకు ?
 అలనాడు నాతో ఆడిన పొగడనీడవిరులా లేక పట్టమహిషి భక్తికి  తూగిన బృందదళమా

పోనీ ఇవన్నీ ఎందుకు నీ ఆరాధనకి ఆరాటపడుతున్న నా హృదయారవిందాన్ని ప్రియమార తీసుకోరాదా......


   
   
  
 



1, నవంబర్ 2012, గురువారం

ఎదురుచూపు ఎట్టకేలకి....

ఎదురుచూపు ఎట్టకేలకి
స్వామి ఎదను తాకింది

యదుకుమారుని మధురపిలుపు
నా హృదిని మ్రోగింది

తడబడు నా అడుగులు
తన పదానికి తాళములైనాయి


కాన నున్న అడ్డంకులు
కనరానివైనాయి

 
కలలోని కన్నయ్య
కన్నుల్లో నిండాడు

కంటిలోని యమున
 

కమలనాభుని పదకమలమున
తళుకులీనింది

   

   

27, అక్టోబర్ 2012, శనివారం

విన్నారా వేణుగానం (2)

విన్నారా ఈ వేణుగానాన్ని
వెదురుకి  స్వరములు నేర్పిన స్వరఝరిని

విన్నారా ఈ వేణుగానాన్ని
రాధకి ఆరాధనని నేర్పిన మధురనాదాన్ని

విన్నారా ఈ వేణుగానాన్ని
బృందావనిలో అందం నింపిన ప్రేమనాదాన్ని

విన్నారా ఈ వేణుగానాన్ని
నెమలికి నాట్యం నేర్పిన నటనానాదాన్ని

విన్నారా ఈ వేణుగానాన్ని
గోవుల శిరమూపిన క్షీరనాదాన్ని

విన్నారా ఈ వేణుగానాన్ని
ఫణిని స్థాణువుని చేసిన స్వరనాదాన్ని

విన్నారా ఈ వేణుగానాన్ని
యమునకి గలగలలు నేర్పిన ఘంటానాదాన్ని

విన్నారా ఈ వేణుగానాన్ని

నింగికి వెలుగునిచ్చిన చంద్రనాదాన్ని

విన్నారా ఈ వేణుగానాన్ని
చందురుడికి చల్లదనాన్ని ఇచ్చిన చందననాదన్ని


 విన్నారా ఈ వేణుగానాన్ని
పుడమికి పుణ్యాన్నిచ్చిన పులకితనాదాన్ని

విన్నారా ఈ వేణుగానాన్ని
సుమాలకి సుగంధాన్నద్దిన సుందరనాదాన్ని

విన్నారా ఈ వేణుగానాన్ని
గంధానికి సుగంధం ఇచ్చిన పరిమళనాదాన్ని

విన్నారా ఈ వేణుగానాన్ని
సిరిని మరపింపచేసే రమ్యనాదాన్ని

విన్నారా ఈ వేణుగానాన్ని

విరించిని విభ్రముడిని చేసిన దివ్యనాదాన్ని

విన్నారా ఈ వేణుగానాన్ని
వీణాధరికి వీనులవిందైన వింతనాదాన్ని

విన్నారా ఈ వేణుగానాన్ని
ముక్కంటిని మురిపింపచేసిన మంజులనాదాన్ని

విన్నారా ఈ వేణుగానాన్ని

అంబ చెవి ఒగ్గి వినే అమృతనాదాన్ని

విన్నారా ఈ వేణుగానాన్ని
శ్రుతులని శ్రుతి చేసిన సుమధురనాదాన్ని

విన్నారా ఈ వేణుగానాన్ని
స్వరాలకి వరాలిచ్చిన రాగనాదాన్ని

విన్నారా ఈ  వేణుగానాన్ని
తాపసిలో  తాపం రేపిన తపననాదాన్ని

విన్నారా ఈ వేణుగానాన్ని

మౌని హృదయంలో ధ్వనించే మౌననాదాన్ని

విన్నారా ఈ వేణుగానాన్ని
గోపకాంతల కన్నుల కాంతినింపిన కాంతినాదాన్ని

విన్నారా ఈ వేణుగానాన్ని
ప్రాణమై ప్రాణిలోనే ఉన్న ప్రణవనాదాన్ని

విన్నారా ఈ వేణుగానాన్ని
తనువుని తలపింపచేయని తన్మయనాదాన్ని

విన్నారా ఈ వేణుగానాన్ని
అమృతానికి అమరత్వం ఇస్తున్న ఆత్మనాదాన్ని

విన్నారా ఈ వేణుగానాన్ని

నాదంతో హృదయాన్ని వేదం చేసిన ఆది నాదాన్ని

విన్నారా ఈ వేణుగానాన్ని
డెందముని గోవిందము చేసే వృందనాదాన్ని

విన్నారా ఈ వేణుగానాన్ని
గోకుల వందనమందిన బృందనాదాన్ని

విన్నారా ఈ వేణుగానాన్ని
మరపు రాని మరువలేని అమరనాదాన్ని

విన్నారా ఈ వేణుగానాన్ని
రాసలీలని రమ్యం చెస్తున్న
రాధామాధవ రసరమ్య రాసనాదాన్ని..

విన్నారా ఈ వేణుగానాన్ని
అధరాలపై దరహాసచంద్రికలు పూయిస్తున్న
రసరాగ స్వరఝరిని .......