ఏకాంతపు ఛాయలో

కాలంలో కలసిన కల ఒకటి
కంటి ముందరే కనిపించి కవ్విస్తోంది
కవ్వింతల తుళ్ళింతలతో మనసంతా
తానై తిరుగాడుతోంది

పుడమిన పుట్టిన పువ్వొకటి
ఆశల పరిమళంతో విరబూసింది
నింగి రాల్చిన అమృతవర్షంలో
తడిసి తడిసి తుళ్ళిపడుతోంది

గాలికి కదలాడే  ఒంటరిదీపం
తీరమేదో చూచింది
వెలుగుతున్న ఏకాంతపు ఛాయలో
నిశ్చలమై నిలిచింది 
 
 

ఎదను వీడింది

మరచిపోయిన మధురగానం
మళ్ళీ పలికింది
మరువనివ్వని మనసులోతుల్లో
మెదిలి నవ్వింది

కంటి కందని కావ్యమేమొ
కలని దాటింది
ఇలను తాకిన కలయె తానై
వెలుగులీనింది

మూగపోయిన మౌనవీణ
మదిన మ్రోగింది
మరపురాని మౌనగీతం
మనసు నింపింది

ఎదుటపడిన యదుకులేశుడు
హృదికి చేరాడు
ఎదురుచూసిన ఎదురుచూపు
ఎదను వీడింది