Saturday 14 March 2015

నీకోసం ఇంకా..


జాలువారుతున్న కన్నీటికి తెలుసు
తన కలలన్నీ కన్నీటి పాలేనని
ఏనాటికీ నీ పదములనంటే పన్నీరు కాలేనని
అయినా నీకోసం ఇంకా ....

ఎదురుచూపుతో ఎగసిపడుతున్న హృదయానికి తెలుసు
ఎడతెగని ఎడబాటే నిజమని
ఎప్పటికీ తన వాకిట నీ పదములు నిలువవని
అయినా నీకోసం ఇంకా ...

కలవరపడుతో నీకై పరుగులిడుతున్న మనసుకు తెలుసు
కలల రాదారి కరిగిపోయిందని
కాంతులీనే కాంతిపథాన్ని ఇక తానెన్నడూ కాంచలేనని
అయినా నీకోసం ఇంకా...

మరలిపోయిన మధురవసంతం మరిరాదని
మధురవేణువు మృదుల పిలుపు ఇక వినరాదని
మనసున దాగిన నీవు మరి కనరావని
మరి నాకు తెలుస్తుందా...
అంతవరకు
నీకోసం ఇంకా....







2 comments:

  1. కలల రాదారి కరిగిపోయిందని
    కాంతులీనే కాంతిపథాన్ని ఇక తానెన్నడూ కాంచలేనని....touching lines

    ReplyDelete