10, మే 2013, శుక్రవారం

మధురగీతమేదో ....

 
 
 మధురగీతమేదో  మదిని మీటింది
 వేణుగానం నా హృదిని నింపింది
 
 అమృతరాగమేదో అవనిని తాకింది
 చుక్కలదీపం నాకై వెలుగునంపింది
 
 రెక్కలపావురమేదో కబురు తెచ్చింది
 వేచిన విరహం నాపై  అలిగిపోయింది

నీ అడుగులసవ్వడి
నా మనసున నడిచింది
నీ పిలుపుల అల్లరి
నా మదిన పలికింది
నీ చల్లని స్పర్శ
నా మేనిన వెన్నెల నద్దింది 
 
నా కంటిన కదలిన కలని
నా కనుల నింపుటకు
నే కనులు తెరిచేసరికి

కనులు కందని కలవైనావు
కనుల దాటి కరిగిపోయావు
  
  



7, మే 2013, మంగళవారం

నయననీలములు



ఏమి ఇవ్వగలను నీకు నేను

హృదయాన్ని అర్పిద్దామంటే
వేచి వేచి వేదనతో వేసారిపోయింది

మనసుని అప్పగిద్దామంటే
తలచి తలచి తానే లేనంటోంది.

తనువుని అందిద్దామంటే
తపించి తపించి తాపమునొందింది
 
మరింకేమివ్వగల నా
నీలమేఘశ్యామునికి నా
నయననీలములు తప్ప

   
  



6, మే 2013, సోమవారం

కలలన్నీ

 
 
కలలన్నీ కలువల్లో దాచుకుని
వేదనలన్నీ వెన్నెలచాటున దాచుకుని
నిట్టూర్పులన్నీ నిశీధిన దాచుకుని
నీ గురుతుల నీడలో
నీ స్మృతుల సవ్వడిలో
ఒంటరిగా తిరుగాడుతున్నాను
దాచిన మల్లెలు మౌనమవుతోంటే
వేచిన హృదయం విచ్చిపోతోంటే
చెంతన లేని నీకోసం  
నా
నీ కోసం
కలలన్నీ .....
    
  


28, ఏప్రిల్ 2013, ఆదివారం

ఎవరూ లేని ఏకాంతసీమలో

 

ఎవరూ లేని ఏకాంత సీమలో
ఉవ్వెత్తున లేచిన ప్రేమకెరటం
నీ మౌనం

ఎవరూ లేని ఏకాంతసీమలో
అంతా తానై నాలో నిండిన వేదం
నీ మౌనం

ఎవరూలేని ఏకాంత సీమలో
ఒలుకుతున్న మధురనాదం
నీ మౌనం

ఎవరూ లేని ఏకాంతసీమలో
నన్నొంటరిని చేసిన గానం
నీ మౌనం
 
ఎవరూలేని ఏకాంతసీమలో
నిట్టూర్పుని తాకుతున్న ఓదార్పు
నీ మౌనం

ఎవరూ లేని ఏకాంతసీమలో
ఎదురుచూపును ఎదనుమోస్తున్న కాలం
నీ మౌనం

ఎవరూ లేని ఏకాంతసీమలో
నాలోని నేను నీవే అన్న నేస్తం
నీ మౌనం
 
ఎవరూ లేని ఏకాంతసీమలో
నన్ను నీలోకి తీసుకుంటున్న మౌనం
నీ మౌనం
అది
ఎన్నటికీ ఎడబాయని వేణుగానం
విరహమెరుగని మౌనసంగమం  
   
     
  
  

23, ఏప్రిల్ 2013, మంగళవారం

కాలపు అలలపై


 
చీకటి దారిలో
కాలపు అలలపై
సాగే పడవ ప్రయాణం

ఒకొక్కరుగా ఎక్కుతున్నారు
తేరిపార చూసేలోగా
గాలితెరల మాటున
కనుమరుగవుతున్నారు
కదిలే నీటి సవ్వడి తోడుగా
చూస్తున్న చుక్కల నీడలో
వీడని నీ చెలిమితో
విరిసే చంద్రోదయానికై
నే చకోరాన్నే అయ్యాను