19, అక్టోబర్ 2013, శనివారం

గుప్పెడు అశ్రువులు


నా పయనం లో
నన్నాపిన  ప్రతీ ముంగిలీ
నీ కౌగిలనే భ్రమపడ్డాను
అందుకే
నీకై
జీవితపు అరుగుమీద
అనురాగపు జల్లులుచల్లి
ఆశలరంగవల్లులు దిద్ది
చిరునవ్వుల తోరణాలు కట్టి
వెన్నెలదీపాలు పెట్టి
ప్రేమమాలని  కానుకనిద్దామని
 ముంగిలిలోనే వేచి ఉన్నాను

లోకపు స్వార్ధపుకరకు జల్లుల్లో
నా రంగవల్లులు కన్నీరవుతుంటే
మోసపు వేడికి తాళలేక
తోరణాలు వసివాడుతుంటే
ఎండలగాలుల్లో నిలువలేక
వెన్నెలదీపాలుమసకబారుతుంటే
వేచి ఉన్నముంగిలి నీడ అన్న నిజంలో
ప్రేమమాల ముకుళించుకుపోతోంటే

చీకటి సముద్రంలో
నిరాశల తుఫానులో
మినుకు మినుకుమంటున్న ప్రాణదీపంతో
దాచినవన్నీ దాటలేని ఎండమావిలో కోల్పోయి
ఇప్పుడు కేవలం
గుప్పెడు అశ్రువులతో మాత్రమే
నీకై పయనిస్తున్నాను ప్రభూ !








18, అక్టోబర్ 2013, శుక్రవారం

నా తీరం


ఆపలేని మృదుభాషణం
 మౌనం

అందరాని అద్భుతసీమ
మౌనం

ఆనకట్టలేని ఉధృతప్రవాహం
మౌనం

మనసు మీటే మధురనాదం
మౌనం

హృదయలోతుల్లో దాగిన వేణుగానం
మౌనం

వెతుకులాటకి అందని వీణానాదం
మౌనం

నీ జాడలు తెలిపే జాబిలివెలుగు
మౌనం

నన్ను నీలోకి కలిపే వెన్నెలచినుకు
మౌనం

నాకై  వేచిన  నా తీరం
నీ మౌనం...


17, అక్టోబర్ 2013, గురువారం

ఒక సాయంత్రం



నాలోకి నే నడిచిన
ఒక సాయంత్రం
నాలో ఉన్న చీకటిని
నాకు చూపింది

నాలోకి నే నడిచిన
ఒక సాయంత్రం
చీకటింట నీ ప్రభువు
చూపే ప్రేమవెలుగుని కాచలేవంది


నాలోకి నే నడిచిన
ఒక సాయంత్రం
తన వెలుగు కనుమరుగు కాకముందే
నా హృదయదీపం వెలిగించుకోమంది


    
   

14, అక్టోబర్ 2013, సోమవారం

ఒకొక్క అడుగు...


ఒకొక్క అడుగు నా నుంచి
నువ్వు దూరం జరుగుతుంటే
ఒప్పుకోని నా మనసు
చెదిరి ముక్కలవుతున్నా
మళ్ళీ పేర్చుకుంటున్నదెందుకో తెలుసా
అందులో నువ్వున్నావని

ఒకొక్క అడుగు నా నుంచి
నువ్వు దూరం జరుగుతుంటే
చూడలేని నా కన్నులని
కన్నీటితో ఓదారుస్తున్నదెందుకో తెలుసా
నీ రూపాన్ని కొద్దిసేపైనా దాచిన అపురూపాలని

ఒకొక్క అడుగు నా నుంచి
నువ్వు దూరం జరుగుతుంటే
నీ జాడ తెలీని నా హృదయం దోవ తప్పకుండా
నా దగ్గరే ఎందుకు ఉంచానో తెలుసా
ఆ హృదయం నీ ప్రతిబింబమని

ఒకొక్క అడుగు నా నుంచి
నువ్వు దూరం జరుగుతుంటే
నమ్మలేని నా నమ్మకం నిజమని
నాకు చెప్తున్నదెవరో తెలుసా
నను తాకిన నీ ప్రేమ వెల్లువ......



22, సెప్టెంబర్ 2013, ఆదివారం

నేను


నేను
నీకై నిరీక్షణలో
కన్నీటి బిందువైనాను

నేను
నీ ప్రేమాంబుధిలో
తడిసి చిన్ని పూవునైనాను

నేను
నీ విరహంలో విరిసిన
విరహపు ఒడినైనాను

నేను
నీ అనురాగపు వర్షంలో
కరిగే చినుకైనాను

నేను
నీ వెలుగులో కురిసే
చల్లని వెన్నెలనైనాను

నేను
నీ మౌనసంద్రంలో  కలసి
నీవయ్యాను