22, డిసెంబర్ 2012, శనివారం

రాధానురాగం


కురుస్తున్న వెన్నెల వానలో
విరుస్తున్న సుమాల వన్నెల నావ

విరుస్తున్న వన్నెల నావలో
మురిపిస్తున్న మురళీధార

మురిపిస్తున్న మురళీ ధారలో
పల్లవిస్తున్న రాధాకృతి

పల్లవిస్తున్న రాధాకృతిలో
జాలువారుతున్న వేణుసుధ


జాలువారుతున్న వేణుసుధలో
పరవశిస్తున్న  రాధారాగం


పరవశిస్తున్న  రాధారాగంలో
కరిగిపోతున్న వంశీరవనాదం

 
కరగిపోతున్న వంశీనాదంలో
కలసిపోతున్న రాధానురాగం.

    
    

15, డిసెంబర్ 2012, శనివారం

నీ ప్రేమ

నీ ప్రేమ పరిమళిస్తోంది
వసంతంలోని
వాసంతికలా

నీ ప్రేమ తాకుతోంది
గ్రీష్మంలోని
చిరుజల్లులా

నీ ప్రేమ దీప్తిస్తోంది
శరత్తులోని
వెన్నెలలా

నీ ప్రేమ నిష్క్రమిస్తోంది
శిశిరంలోని
శూన్యంలా.....

    
    
    
     
       

11, డిసెంబర్ 2012, మంగళవారం

సరోజం


నీ వదనసరోజం
నయనానందం
 

నీ అధరసరోజం
వేణువినోదం
 

నీ హృదయసరోజం
రాధానందం
 

నీ పదసరోజం
ముక్తి ముకుందం

    
   
  

2, డిసెంబర్ 2012, ఆదివారం

నీకు తప్ప


నా కన్నుల్లో కాంతి

నా పెదవులపై చిరునవ్వు
 

ఈ కవ్వింతలు
 

ఈ తుళ్ళింతలు
 

ఈ కేరింతలు
 

అన్నీ
 

ఇవన్నీ
 

నీకై దుఖిస్తున్న నా మనసుకి
 

నే కప్పిన వలువలని
 

ఎవరికి తెలుస్తుంది ?
 

నేను తెలిసిన నీకు తప్ప .....
     
    
    

27, నవంబర్ 2012, మంగళవారం

ప్రియమార తీసుకోరాదా ....


రేయంతా రాసలీల చూసిన ఆకాశం సిగ్గుతో ఎర్రబడుతో నన్ను హెచ్చరిస్తోంది నీ పూజకి వేళవుతోందని.
 

మాధవా !  అడిగావుగా మరి మైమరపింపచేసే పుష్పాన్ని ఒకటి తెచ్చిపెట్టమని.
 

విరిసిన నందివర్ధానాలు ఇప్పుడా రావడం అంటూ స్నేహం గా పలుకరించాయి. కోయనా వాటిని .
 

ఇదిగిదిగో ఇక్కడున్నాను అంటూ మంచుతడిలో ఆకుల చాటున నక్కిన ముద్ద నందివర్ధనం నవ్వుతూ పిలుస్తొంది. తీసుకోబోతుంటే మరొక పిలుపు ఎటు నించి?
 

అదిగదిగో ఆ మల్లెపొదనుంచి ....
ఆగాగు రాత్రనగా విచ్చితే ఇప్పుడా వచ్చేది అని కాస్త చిన్నబుచ్చుకుంటున్న మల్లెలు . జల్లనా మరి 


మేమిక్కడ అంటూ ఎత్తున ఉన్న కరివేరం సుగంధాలు నిన్నూ పిలుస్తున్నాయా ...
 

నిన్ను తాకితే గాని విచ్చుకోనని మారాం చేస్తున్న మందారం, ఆగలేక తాళలేక రాలిపడుతున్న పారిజాతం ...
 
అసలైనా ఏది ప్రియం నీకు ?
 అలనాడు నాతో ఆడిన పొగడనీడవిరులా లేక పట్టమహిషి భక్తికి  తూగిన బృందదళమా

పోనీ ఇవన్నీ ఎందుకు నీ ఆరాధనకి ఆరాటపడుతున్న నా హృదయారవిందాన్ని ప్రియమార తీసుకోరాదా......