కృష్ణా ! నిన్ను నమ్మేదెలా !!

పాశం లేదంటావు
రాతి రోటికి కట్టిన పాశానికి బద్ధుడైనావు

రాగం లేదంటావు
రాణుల అనురాగానికి రంజిల్లావు
 
అందరూ సఖులు ఒకటే  అని మరపిస్తావు
అటుకులకి మాత్రమే మురుస్తావు

దొంగని కానంటావు
మనసుని దోచేస్తావు

ఏ పత్రమైనా ఒకటే అంటావు
బృందపత్రానికే తూగుతావు
 
ఏ పుష్పమైతేనే అంటావు
మానసపుష్పానికై మారాం చేస్తావు

ఏ ఫలమైతేనే అంటావు
భక్తి ఫలానికే వరమవుతావు

తోయమైనా చాలంటావు
ప్రేయసి ప్రేమారాధనాధార కే కరుణిస్తావు

బంధరహితుడు ని అంటావు
రాధా హృదయంలో బందీవై వుంటావు

కృష్ణా !  నువ్వు అంటున్నదొకటి చేస్తున్నదొకటి
నిన్ను నమ్మేదెలా  అంటే

రాధా ! నిన్ను నువ్వు నమ్మేందుకు
 సందేహమెందుకు ! అంటావు